Um Selárdal í Eintúnaháls og fram með Stjórn í Stórhóll.

Leiðin liggur af Lakavegi móts við Flangháls og farið er inn með Selá langleiðina að línuvegi. Áður en línuvegurinn var lagður lá gamla gatan upp á Túnheiðina um Götutorfu og þar sjást gamlir slóðar sem þræða sig upp torfuna. Á heiðarbrúninni ofan torfunnar er Hvílusteinn en hjá honum eru krossgötur og betra að gæta þess að halda sig við götu sem hefur vestlæga stefnu og er þá fljótlega komið á línuveginn. Þar sem rekstrarleið og línuvegur mætast eru tvær vörður sem vísa á rekstrarleiðina (þegar komið er eftir línuvegi úr vesturátt). Hægt er að fara strax á línuveginn þegar komið er að Götutorfu og sleppa því að fara upp torfuna. Línuveginum er fylgt til austurs uns komið er aftur á Lakaveg og farið er með honum uns komið er í Eintúnaháls.

Frá Hálsinum er farið yfir ána Stórn og fram með henni um Hleypiflatir á eystri bakka Stjórnar . Þar lá gamla ferðaleiðin í Eintúnaháls og eru greinilegar reiðgötur, margar samsíða götur, sem liggja fram bakkana.
Þegar Hleypiflötum sleppir er komið að línuvegi þar sem hann þverar Stjórn og fylgja skal veginum til vesturs, að Stórhól, en þar má sjá rústir heiðarbýlisins sem var í Stórhóli.

Þaðan er haldið áfram vestur með línuveginum uns komið er að hliði á markagirðingu á Klausturs- og Heiðarselslandi. Þegar komið er í gegnum hliðið skal farið af línuveginum og fremur óljósum götum fylgt sem stefna til hásuðurs. Er þá fljótlega komið að mýrarkróki sem heitir Flangir og liggja þær undir Flanghálsinum. Þetta er "smalaleið um Flangir" og liggur hún vestur fyrir krókinn og undir Flanghálsinum uns komið er aftur á Lakaveg þar sem gangan hófst. Hringurinn er um 12 km.