Sýsluvegur um Holtsdal (hinn forni) - Skhr

Sýsluvegur um Holtsdal var hluti af alfaraleið milli Skaftafells- og Rangárvallasýslu og lá hann frá Kirkjubæjarklaustri út (vestur) Síðuna yfir í Skaftártungu. Vegurinn var kortlagður af dönskum landmælingamönnum um aldamótin 1900 og finna má kortlagningu hans á Atlaskorti LMÍ nr. 68. Leiðin lá inn Holtsdal, yfir Holtsá framan við Hervararstaðaháls og um Helgadalsháls að Lambhagaá við Austastafell. Þaðan lá leiðin fram með Lambhagaá uns stefna var tekin í Selklif í heiðarbrúninni (Hælskaflinum/Skaflinum). Þar fór gatan niður klifgötuna og inn með Skaftá að vaði á Skaftárdalsvatni framan við Skaftárdal. Var þá komið í land Búlands í Skaftártungu.
Leiðin um Selklif og inn með Skaftá að Skaftárdal hefur nú spillst smjög vegna mikillar gróðurþekju en einnig vegna breytinga í farvegi Skaftár. Þykkur mosi og víðiplöntur gera götuna þungfæra á köflum auk þess sem hún er víða horfin. Þegar nær dregur Skaftárdal er gamla gatan rofin burt af ál úr Skaftá og þarf því að halda lengra inn með Skaftá að vatnamótum við Dalsá og áfram inn með henni uns komið er á aurana framan við Dalsárgljúfur. Þar er best að fara vestur yfir ána því framar geta verið sandbleytur, sérstaklega nálægt vatnamótum við Skaftá.

Frá Holti að Skaftárdal um Sýsluveginn forna eru um 20 km en leiðin öll er afar sérstæð og skemmtileg ferðaleið. Þar sem farið er um hlaðið á þremur bæjum (Holtsbæjunum tveimur og Skaftárdal) er afar gott að láta landeigendur vita af ferðum sínum sé þess kostur. Ferðist menn á hrossum er mikilvægt að gæta þess að ekki skapist ónæði eða óþrif heima á hlaði.