Trilho Castrejo en Castro Laboreiro (Modificado e ampliado)

“Em Castro Laboreiro, todo o proprietário, por muito diminuto que seja o seu património, tem, como qualquer lord inglez, duas habitações – uma de verão e outra de inverno". Isto escribia Alfredo Campos, escritor, sobre o modo de vida transhumante dos pastores na segunda metade do século XIX.

Tendo como base e guía o trilho Castrejo a ruta modificouse para visitar as brandas de Pradosouro e a Seara, así como tamén visitar a capela da Nossa Senhora de Anamão. A modificación máis importante está ao chegar a ponte da Cavada Velha, onde collemos collemos a esquerda e baixamos ao carón do río Laboreiro ata a inverneira de Ameijoeira para despois comezar o camiño de volta pola inverneira de Pontes, hoxe convertida ao turismo rural. Logo cruzamos polo fermoso acueduto de Pontes chegando despois a Assureira, onde volvemos coller o trilho Castrejo.

O longo da ruta temos sempre presente o espírito e a vida transhumante dos antigos castrexos, vida que implicaba que os pastores habitaran a maior parte do ano nas brandas, situadas nas partes altas da montaña, e nas épocas máis duras baixaran a vivir nas inverneiras, situadas na parte baixa e máis resgardadas do frío e da neve.

Esta ruta comezámola en Castro Laboreiro visitando en primeiro lugar os restos do Castelo - Fortaleza, situado a 1.050 m de altura. Tras esta visita imos ver os muíños do río Laboreiro, para despois coller camiño as inverneiras de Varziela e Cainheiras, logo seguimos ata as brandas de Pradosouro e a Seara, para continuar ata a capela da Nossa Senhora de Anamão. Logo pasamos polo Bico do Patelo (formación pétrea onde poderemos “imaxinar a un pato ou a una aguia” divisando o val) e baixamos para a inverneira de Curveira, seguimos ata a ponte da Cava da Velha e collemos a esquerda seguindo o curso do río Laboreiro ata a inverneira da Ameijoeira (a Ameijoeira marca o límite fronteirizo entre Portugal e Galicia). Comezamos a volta polas inverneiras de Pontes, Assureira e Barreiro. Xa no último tramo subimos pola carballeira de Barreiro e a lagoa de Gontamil para rematar en Castro Laboreiro e coñecer a igrexa de Santa María da Visitação e o Pelourinho.

A pesar de parecer longa, uns 30 quilómetros, a ruta é espectacular.