TREKING POLO GEOPARQUE MONTAÑAS DO COUREL. RUTA DO OSO CAVERNARIO. Etapa 2 de SEOANE A FROXAN

TREKING POLO GEOPARQUE MONTAÑAS DO COUREL
RUTA DO OSO CAVERNARIO
DO CAMIÑO DE SANTIAGO POLO LOR AO SIL E VOLTA POLOS VALES DO POÑENTE

Que mellor área xeográfica natural en Galicia que a Serra do Courel para facer un treking. É o único espazo natural galego coa categoría de geoparque e como tal foi recoñecido pola UNESCO no 2019. Neste geoparque deseñamos a ruta do Oso Cavernario que consta de sete etapas das que a segunda, a terceira e a metade da cuarta corresponden coa antiga Baixada do Lor, ruta que historicamente une O Cebreiro, nos altos da Serra de Rañadoiro, polo que decorre a parte de máis altitude do Camiño de Santiago ata a desembocadura do Lor no Sil en Augasmestas (Quiroga). A segunda parte da cuarta etapa e as tres últimas consisten en subir polo Courel do Poñente percorrendo en parte bacías do Loureiro e do Lóuzara, ámbolos dous afluentes do Lor. Para a primeira etapa danse dúas alternativas diferentes, a primeira que vai ao encontro do Lor por Esperante e que ten uns 4 quilometros de estrada, e a segunda por Noceda e a mina da Toca.
O nome da ruta “Oso Cavernario” ven de que o Courel foi poboado por osos dende hai moitos milenios e como proba están a cantidade de osamentas de oso cavernario atopadas nas covas do Courel, moitas sitas a vista de paxaro de onde discorre a ruta.

Etapa ORIGEN DESTINO SEGUNDO orux maps
DISTANCIA DESNIVEL + DESNIVEL -

1A por Esperante Hospital da Condesa Seoane do Courel 18,71 km 437 m 1041 m
1B por A Toca Hospital da Condesa Seoane do Courel 17,7 km 620 m 1224 m
2 Seoane do Courel Froxán 22,51 km 699 m 872 m
3 Froxán Conceado do Lor 18,29 km 540 m 737 m
4 Conceado de Lor Vilachá de Salvadur 16,54 km 633 m 430 m
5 Salcedo Vilamor 15,63 km 650 m 607 m
6 A Pendella Paderne 22,17 km 1180 m 693 m
7 Paderne Hospital da Condesa 21,49 km 1130 m 790 m
TOTAL 135,34 km 5269 m 5170 m

ETAPA 2: DE SEOANE A FROXAN

Saíremos de Seoane cara ao Lor pasando pola ponte da Ferreiría nova ou de Locay. O mazo foi restaurado pola Xunta hai uns 30 anos estando hoxe pechada, pero aínda así pódese visitar en parte, vendo os seus canles e tanques. Atravesamos o Lor pola ponte da Ferrería. Un camiño ben conservado levaranos a traveso de paisaxes cambiantes, dende bosques de ribeira a espectaculares soutos, tendo como compaña o Lor sempre á nosa dereita. Pasaremos a carón das aciñeiral de Vales para asomarnos despois á Pena do Escribano, un mirador cunha caída natural de 200m onde hai unha área recreativa. Cruzamos o rego de Paradela onde poderíamos achegarnos a mina de ferro do mesmo nome. Na derradeira curva antes de baixar ao rego de Ferreirós albiscamos o pico de Penaboa por onde decorre o quilómetro vertical do Courel. Pronto chegaremos a Ferreirós Dabaixo onde visitaremos O Pontón unha bucólica cantina onde o tallado artesanal das madeiras de castiñeiro e carballo atopan a súa máxima expresión (aberto só sábados e domingos ao mediodía). Aquí mesmo comeza o quilómetro vertical do Courel, desbrozado polo seu autor, todo un súper heroe, que vive a unha carreiriña de can, en Ferreirós Darriba.
Pero para nós, non é tempo de subida, é de baixada polo Lor. Pasaremos por baixo de Folgoso do Courel para cruzar o Lor pola Ponte de Traspando e despois o seu afluente o Lóuzara pola ponte de Sundrios. Xa estamos cruzando as aldeas de O Touzón e A Pendella con algunha fermosa casa recentemente restaurada. Cruzaremos o Lor pola ponte Baldomir para subir por un souto centenario cara a aldea da Campa para logo seguir abeirando o Lor a certa altitude ata comezar a albiscar o xigantesco meandro do Lor que se forma entre o Castro de Vilar e Vilamor.
En Vilar beberemos da auga da Fonte da Saúde, veremos o seu forno e o artesanal palco de música sito no medio dunha carballeira, non sen antes visitar a Juan e o seu museo etnográfico. Logo en subida atopamos o Castro de Vilar coa súa enxebre capela. No castro as vistas do cóbado que fai o río neste lugar son espectaculares En lixeira baixada chegaremos á ponte do Bao que cruzaremos para chegar, atravesando o sobreiral de Froxán a esta aldea que foi obxecto de plans de rehabilitación, sendo sede da Asociación Fonte do Milagre que limpou montóns de camiños no Courel e aínda descubriu canles romanas. Aquí, na Eira de Froxán reuniu Calleja a todo o Courel para rodar un programa moi comentado que nos fixo emocionarnos co sentir desta xente. Ao remate da etapa teremos cruzado catro pontes, tres sobre o Lor e unha sobre Lóuzara.

DATOS DE INTERESE
Casa da Aira en Froxán (Tf: 669930565 ) ofrece aloxamento e mantenza.