'Syðri leið' aðalpóstleiðin um Mýrdalssand - Skaftárhreppur

Mýrdalssandur hefur að geyma merkar minjar um sögu okkar Íslendinga og ef ferðalangur sem ekur þjóðveg eitt um Mýrdalssand, er vökull og með glöggt auga, þá gefur að líta grjóthlaðnar vörður sunnan og norðan vegarins þegar komið er hjá Dýralækjarskeri. Vörður þessar eru hluti af samgöngusögu Íslands og tilheyra fornri ferðaleið yfir Mýrdalssand fyrir tíma rennireiða og akfærra vega.
Í Söguþáttum Landpóstanna eftir Helga Valtýsson kemur fram að aðalpóstleiðin um Vestur-Skaftafellssýslu lá frá Jökulsá á Sólheimasandi til Víkur í Mýrdal og þaðan áfram austur um Mýrdalssand í Álftaver. Einnig kemur fram að bréfhirðing eða póstafgreiðsla hafi verið í Vík (Suður-Vík) og hafi þar jafnframt verið náttstaður póstsins. (Helgi Valtýsson, 1973). Í Árbók Ferðafélags Íslands frá árinu 1935 er lýsing á svokallaðri „syðri leið“ um Mýrdalssand en landpósturinn, svokallaður Sunnanpóstur, fór þá leið.

"Liggur syðri leiðin, Álftaversleið, beint í austur, miðja vega milli Hafurseyjar og Hjörleifshöfða, yfir Háöldu- og Blautukvíslar, um Dýralækjarsker og Kælira, að Herjólfsstöðum í Álftaveri. Í Dýralækjarskerjum er sæluhús, en gróðurlaust í kring. Á þessari leið eru víðast leiðarmerki, stikur að vestan en grjótvörður, þegar austar dregur, og því auðratað í sæmilegu veðri."
(Óskar J. Þorláksson, 1935)

Stikurnar vestan Dýralækjarskers sem nefndar eru í þesssari leiðarlýsingu frá 1935 eru að sjálfsögðu horfnar en vörðurnar í skerinu og austan þess standa vel, verðugir fulltrúar sögunnar. Leiðin milli kofans í Dýralækjaskeri og að Herjólfsstöðum er 9-10 km.