Sotu Agues al Picu Cullargayos y la foz del Nozalín

Nel Parque Natural de Reres, vamos subir al Picu Cullargayos (1391m) siguiendo’l PR-AS-63 nuna ruta circular dende Soto Agues. Esta ruta, amás del terrenu que pisamos va ofrecenos unes vistes buenísimes del centru y oriente d’Asturies.

Un recorridu nel que vamos transitar dende los pueblos, praos, castañeos y mayáes dominaos pola mano humana hasta los fayeos, escobios, picos y foces nos que manda la naturaleza.

Datos:
Entamu: Soto Agues, aparcamientu.
Accesu: AS-117 (Corredor del Nalón) hasta Rusecu, tomando ellí la SC-2 a la derecha durante 3,5 km hasta Soto Agues.
Final: Circular
Distancia: 15 km
Tiempu: 6h
Desnivel: 1014m
Altor másimu: 1391m
Altor mínimu: 422m
Dificultá: Media. Tien pasos con sensación de verticalidá y una trepada sencilla.

Ruta:
Arrancamos en Soto (422m) cruzando la ponte sobre’l ríu L’Alba pa pasar los barrios d’Agues y de San Andrés, tomando a la salida d’esti la pista en dirección Este xuntu al ríu Les Argayades separtándonos d’él cuando llevamos 1,6km adientrándonos nuna viesca que nos lleva dar a Llaíñes (3km, 620m). Cruzamos el pueblu pa siguir, primero per pista aformigonada siempre arriba hasta la Mayá Faidiellu y ensiguidina a Les Collaínes (5,4km, 919m) onde xunto al bebederu podemos tomar un descansu. La ruta va tomando rumbu Sur p’adentranos nel Monte tornu pela Senda Los Vaqueros. Esti escobiu de gran belleza poles vieyes fayes que nos acompañen va dar, tres de pasar xunto a l’afuracadura d’una mina de cobre antigua, a la mayá Imblenes (6,8km, 1127m) . Equí podemos tomar un desvíu mui breve pa tener una vista panorámica de gran parte de lo andáu y munchu más.
De vuelta a la ruta, tomamos la opción de entrar a mano derecha buscando la cresta que, coles mayaes al Sur y los fayéos al Norte, y cierta sensación de verticalidá, va averanos a la cumbre. Prestaremos gran atención en cada pasu y a lo últimu, con una trepada fácil na que la propia piedra nos impide la caida a los llaos, algamamos la cima del Picu Cullargayos (8km, 1391m).
El descensu, en claru rumbu Sur, facémoslu con atención al desnivel hasta la Colada Mezquita, onde nel cruce señalizáu xiramos a mandrecha pa la mayá Feleches (9,6km, 1096m). El descensu continúa per pista ancha y pindia hasta dar col ríu Nozalín, del cual siguimos el calce suavizando la pendiente y entrando na foz del Nozalín. Una vez de vuelta al valle, unos 2 km suaves van dexanos en Soto otra vez. Acabamos!
Notes:
- La ruta sigue’l PR-AS-63 y tien marques de pintura y fitos.
- Si nun queremos pasar la cresta, evitando la sensación de vértigu, na mayá Imblenes podemos siguir de frente hasta la collá Mezquita y atacar dende esa parte la cima. Facemos más recorríu.
- El “Parque Natural de Redes” (1996) toma’l nome del Fayéu de Reres.
- Reres cuenta con más de 40 rutes marcaes que recorren más de 200 km pal senderismu.
- En Llaíñes, busca la destilería y tienda de mieles y llicores… meyor al acabar.
- Pa más información, sígueme y contacta en Facebook, Instagram o Wikiloc: Xurde Llano Montes.