Ruta escultor Ursi. PRC-P2. San Cebrián de Mudá. Palencia.

Ruta sinalizada que pode comezarse en distintos puntos de acceso. O empregado neste percorrido é o máis acaído porque está na cota máis baixa e ten aparcadoiro para os vehículos. Para realizala, foron úteis as informacións deste track: https://gl.wikiloc.com/rutas-sendeirismo/montana-palentina-senda-del-escultor-ursi-pcr-p02-77426382
Comzamos, pois, a carón da estrada PP-2125 no estacionamento próximo da localidade de Villabellaco. Atravésase esta pequena aldea e sáese por onda a igrexa (románica do século XIII)
Tanto no comezo, coma dentro da poboación, coma no resto da camiñada, hai chantadas unha serie de esculturas adicadas polos seus amigos á memoria do escultor de Valbellaco Ursicino Martínez, falecido en 2007. Estas obras artísticas son variadas en estilos e materiais, e aportan un notábel interese ao percorrido.
A ruta está sinalizada e despexada. Porén, sempre é unha boa axuda levala gravada nun aparello con GPS.
Logo de Villabellaco a ruta intérnase nunha zona de touza con variedade de árbores pero con predominio de carballos. Dende unhas penas temos unha boa panorámica do val, é o miradoiro de De La Umbría.
A seguinte poboación que atravesa a ruta é Valle de Santullán. É esta unha aldea con bo casarío e abondosa en augas. Destaca tamén a súa igrexa, con partes do século XIII e máis do XVI
Atravésase a estrada PP-2125 e sóbese cara o miradoiro de La Solana que se acha no topo dunha campa penedía. As vistas son espectaculares.
Agora descéndese polo medio doutra zona arborada ata o santuario da Virxe do Carmo, que é a patroa do val. Dende aquí, xa por camiños descubertos, e os derradeiros 200 metros por estrada, vóltase ao punto de comezo e fin.
Como queda dito, a ruta ten moitos treitos que van por medio de carballeiras. Case toda é por camiños, carreiros ou pistas, perfectamente transitábeis. A disposición de esculturas (máis de 30) repartidas polo itinerario consegue facer aínda máis ameno o percorrido. É unha camiñada doada para persoas cunha mediana preparación e experiencia de camiñar por monte. En todo caso, a decisión de percorrela é de cadaquén.
No trazado hai unhas cantas fontes, tanto nas poboacións coma outras no monte. Non consta a súa potabilidade.