Ruta do río Camba: Camba - Portocamba - Campobecerros

Ruta sen marcar, moi entretida, polo alto val do río Camba. Comezamos en Camba e de seguido collemos á esquerda un camiño por unha ladeira, con excelentes vistas e curiosas formacións xeolóxicas. Logo, nunha bifurcación tómase á dereita, onde se levanta un montonciño de pedras, dende o que parte un sendeiro de pescadores que descende ata o río e chega ata unha pequena presa, cuns fermosos saltos de auga, onde se cruza (hai que descalzarse). A continuación cóllese unha pista zigzagueante ascendente, o máis duro do percorrido, que acaba nun alto. Xa no outro lado do monte, xírase á dereita e despois cóllese un cortalumes en forte descenso e chan de lousa, que conecta cunha pista dirección sur dende a que o río volve estar cercano. Pódese intentar vadear o río outra vez ata en dous puntos e tomar o camiño da outra ribeira, máis pegado ó río, aínda que o máis sinxelo é seguir ata Portocamba, punto intermedio da ruta, unha aldea pintoresca moi representativa da arquitectura popular da zona. Dende aí, pola ribera sur ou dereita tomamos o camiño a Campobecerros, pero este desaparece e durante uns douscentos metros hai que loitar coa densa vexetación para buscar os prados e outra vez encontrar camiño; dada a dificultade deste punto, marco na ruta a opción por estrada. Iso sí, nós pasar, pasamos pola senda do río, máis suxerente que a estrada obviamente. Si se escolle facer o tramo por estrada, despois de pasar unha placa en memoria duns carriláns portugueses represaliados, regrésase á ruta orixinal a través dun cortalumes (á esquerda e outra vez á esquerda, ata conectar coa ruta orixinal). O camiño avanza, chégase a unha presa e desaparece un centenar de metros por un prado que se pode andar sen dificultade, e reaparece para ascender ligeramente, proporcionando unhas fermosas vistas panorámicas da cara norte do val primeiro, e do meandro con prado despois, ata empalmar coa estrada, xa chegando a Campobecerros. O final da ruta pode ser na parte alta da aldea, ou descender 200 metros máis ata a vella ponte (inicio á súa vez doutras rutas que rodean o Invernadoiro polo sur e o leste).