Ruta de Fontefría

Este sendeiro que comeza no Alto de Fontefría -na estrada N-120 que liga Vigo con A Cañiza- contaba cunha precaria sinalización que co tempo desapareceu. Ao comezo hai un cartel no que lemos:

“A Ruta de Fontefría constitúe un sendeiro circular que transcorre entre as parroquias de Achas de Petán, no concello de A Cañiza e a de Santiago de Covelo, no concello do mesmo nome.

O punto de partida da ruta se sitúa no Alto de Fontefría a 790 metros de altitude, do que se parte en dirección norte ata chegar a unha zona na que se atopan varias mámoas. Continúase polo sendeiro ata chegar ao tramo do concello de Covelo e logo dirección ao paso do regato Portapiñeiros e as turbeiras da Porta do Boi. Dende alí entre bosques de piñeiros, vóltase ao inicio da ruta no Alto de Fontefría.

A nivel medioambiental e paisaxístico, predominan ao longo do percorrido as zonas arboradas de piñeiro, así como zonas de monte baixo e matos. No referente a recursos hídricos, destacan o paso do regato de Portapiñeiros e a existencia de varias brañas e turbeiras.

Diversos restos megalíticos evidencian a ocupación desta serra tres mil anos antes da nosa era. Preto do camiño atópanse varias mámoas e unha necrópole que formaron unha ruta de tránsito natural.”

Este sendeiro na zona onde pasa o rego Portapiñeiros cadra co Sendeiro da Pedra do Lobo e aquí atopánse tamén as brañas da Porta do Boi. Un cartel di:

“A braña da Porta do Boi ocupa na actualidade unha extensión dunhas 2,3 ha. Este importante humidal é chave na regulación dos procesos de erosión e do ciclo da auga tendo incidencia sobre as zonas máis baixas, onde reside a poboación humana. Nesta función cumpren un especial papel como reservorios de auga.”