Ruta da Pedra e da Auga + ruta do río San Martiño

Combinamos dúas rutas curtas: a ruta da Pedra e da Auga (PRG 170) e a ruta do río San Martiño (PRG 171).
Esta ruta pode disfrutarse en calquera época do ano, pero cadrounos en febreiro e tras dous meses de chuvia continuada... impresionante a cantidade de auga que levan estes ríos, a forza coa que baixa...
A ruta da Pedra e da Auga comeza na rotonda de Barrantes e transcorre á beira do río Armenteira. Abundan os muíños, varios deles restaurados, e un par de quilómetros do comezo atopamos unha zona de esparexemento con merendeiro e cunha "aldea labrega", unha curiosidade para os cativos, na que se reproducen a capela, o lavadoiro, o forno, algúns aldeáns e mesmo un caganet deses... seica o autor tampouco puido fuxir desa moda de meter un cagón no medio de calquera paisaxe tradicional... sen máis comentarios.
A partir desa aldea labrega a ruta é preciosa e non ten desperdicio. Unha ascensión moi suave lévanos, de muíño en muíño e gozando do ímpetu da auga que semella querer chegar ao val canto antes, até o mosteiro da Armenteira.
A uns cen metros do mosteiro atopamos o panel informativo da PRG 171. Aquí optamos por continuar seguindo a proposta de Sudandobotas (http://es.wikiloc.com/wikiloc/view.do?id=1670712) e desviámonos durante uns quilómetros da ruta marcada, pensando que a ascensión nos levaría a algún miradoiro sobre a ría de Arousa, mais enganámonos. Cremos que non paga a pena desviarse e de facer de novo esta ruta seguiriamos as marcas do PRG 171 sen dubidalo (un campo de golf e un curro non xustifican o desvío).
Tras uns quilómetros atopamos o río San Martiño, con moito menos caudal que o Armenteira pero que descende salvando maiores desniveis. Probablemente no verán vaia case seco, mais en tempo de chuvia é realmente espectacular como baixa saltando as pedras. Tamén atopamos varios muíños e o contorno do chamado muiño do Cubo é ben bonito.
A ruta perde algo de encanto a partir da igrexa de San Salvador de Meis, pero segue a ser agradable posto que practicamente non hai que pisar asfalto e o río volve acompañarnos.
Moi recomendable.