RUTA DA GEIRA E DOS ARRIEIROS EN TEO

Treito do Camiño xacobeo da "Geira e dos Arrieiros" ó seu paso polo Concello de Teo entre a vila de Pontevea e o linde co termo municipal de Santiago de Compostela. Senda recuperada a iniciativa da Asociación Cultural Codeseda Viva da Estrada e da Concellaría de Cultura do Concello de Teo. Ruta xacobea recoñecida polo Cabido catedralicio o que permite a obtención da "Compostela", a credencial ou acreditación do Peregrino.
O camiño atravesa de S a N o termo municipal teense e discorre polos sitios e lugares que testemuñan as fontes documentais. No Medievo dan conta do paso dos peregrinos dende a ponte de Pontevea, que salvaba ó Ulla e daba entrada ás terras de Compostela, á ermida de San Sadurniño no Montem Altum (Montouto). Cómpre destacar o paso polas igrexas de orixe Medieval de S. Cristovo de Reis (con importantes vestixios románicos) e San Simón de Ons de Cacheiras e pola urbanización de San Sadurniño onde houbo unha ermida, xa desaparecida, que cristianizaba o "humilliatorium" de entrada a Santiago de Compostela no punto onde os peregrinos albiscaban por primeira vez as torres da catedral. As advocacións de San Cristovo (santo padroeiro dos peregrinos) e San Sadurniño reflicten tamén esa conexión coa vía xacobea que tiña entrada na cidade apostólica pola Pontepedriña, que franqueaba o Sar, e a Porta da Mámoa ou de "Sussanis".
Con posterioridade documentos do s. XVII ó s.XX testemuñan o paso dos arrieiros polos sitios do Cruceiro (actual Pontevea), Chadorrío, A Florida, A Ponte Nova, A Lagoa (Ramallosa), etc.
Un camiño histórico que atravesa espazos naturais como a fraga de Sestelo e transcorre a rentes de numerosos bens culturais (Ponte Medieval de Pontevea, Igrexa Románica de Reis, Fonte da Florida, A Ponte Nova de Rarís, Igrexa e viacrucis de San Simón de Cacheiras, Castro de Sebe, Petróglifo da Pedra Estivada, Mámoa de Montouto) e etnolóxicos (Cruceiros como da Florida, o Calvario e A Igrexa en Cacheiras, Fontes e lavadoiros, Muíños do Sestelo e Chaodorrío, Palco da Música do Calvario, etc).

Documentación de Arquivo:
Documento do Tumbo C, fol.265 r-v (Arquivo-Biblioteca da Catedral de Santiago)
Documento do Tumbo A, doc. 67, p. 189 (Arquivo-Biblioteca da Catedral de Santiago)
Serie: Solicitudes de sobravantes de vía pública (1940-1950). AMT. Sig. 24

Bibliografía:
HOYO, J. "Memorias del arzobispo de Santiago" (1607). USC, 2016 (Capela de San Sadurniño, p. 198)