RUTA DA AUGA

Saíndo de Becerreá remontaremos o curso do río Narón, principal afluente do Navia no Concello, na busca das súas fontes, rematando no pobo homónimo de Narón. ó longo de 14 quilómetros, seguiremos a canalización que trae a auga á capital do Concello, de ahí a denominación de ruta da Auga. Trátase dun percorrido de rumbo suroeste, que vai fuxindo da sombra da montaña de Pena do Pico, polo que é moi soleado e unha opción ideal para os días de xeada do inverno.
Por outro lado, os primeiros quilómetros do percorrido transcorren pola estrada de Vilar de Ousón, que é coñecida tamén como estrada de Quiroga, xa que comezou sendo un proxecto para unir Becerreá con esta poboación da Ribeira Sacra. O proxecto morreu no punto quilométrico seis, pero pódese imaxinar a viaxe, salvando dous escollos importantes: a serra do Poio e os montes do Courel.
Comezamos a camiñar na Feira Nova tomando a estrada de Vilar de Ousón, e en pouco traxecto atoparemos a sinalización do quilómetro 1, onde iniciaremos un forte descenso ata a curva da Moura. Aquí a estrada comeza a subir, primeiro pouco a pouco, e tras pasar o quilómetro 3, en forte pendente. Ó chegar a Vilar de Ousón seguimos a estrada, e cerca teremos espectaculares vistas ó val do Narón á altura do quilómetro 4. Desfrutando desta panorámica, despois duns cincocentos metros atoparemos o cruce da pista que sube a Penalta, pero nós continuaremos pola estrada que se transforma en pista de grava, primeiro, e en camiño, despois. Bordeamos Penalta e, mirando o val, podemos adiantar o noso trazado. Pasaremos por un cilindro de formigón que sinala o punto quilométrico 6, onde morre a estrada de Quiroga e, uns metros máis adiante, continuamos pola pista principal que nos leva a Monelo.
En Monelo collemos o camiño veciñal que nos leva ata Arroxo e Lamarrío. Entre as casas, enfronte da fonte, sae un camiño á esquerda que nos baixará por un souto ata case chegar ó río, e seguiremos val arriba pola pista que nos leva a Freixo. Dende aquí continuaremos por pista asfaltada ata Ferreiros de Balboa, un dos núcleos de poboación máis grandes de Becerreá.
En Ferreiros buscaremos o cauce do Narón, que seguiremos remontando xa na parte final do noso percorrido, no que teremos que salvar algúns tramos de fortes pendentes. O último quilómetro, sen embargo, é doado ata os muiños de Ferreiras e da Taberna, onde continuamos ata o núcleo de Narón, que porá punto e final ao noso percorrido.