Ribadavia ás termas do Prexigueiro

Comezamos a ruta en Ribadavia para logo seguir esta: https://gl.wikiloc.com/rutas-sendeirismo/termas-de-prexigueiro-ribadavia-3698003 A idea é facela de ida e volta.
A camiñata é doada pois a mor parte dela descorre pola beira do encoro, cun perfil chan. Tan só a subida á aldea de Prexigueiro tén unha curta, aínda forte, costa. Na fin, pódese tomar un baño, ben no balneario de pago ou ben nunhas pozas a carón do río. Dependendo do nivel deste, poderían estar cubertas. O lugar non está moi acondicionado pero a cambio pódese tomar un baño de forna natural, nudismo incluído.
As paisaxes que atravesamos son fermosas (mágoa o abandono do campo) e o camiño lévanos á xoia prerrománica da capela de San Xes, en Francelos. Esta aldea mostra tamén moi interesantes casas tradicionais que falan dun tempo de mor riqueza e poboamento que a actual.
Atravesamos unha ponte (medieval) sobre o río do Outeiro e vemos, na ladeira de enfronte, a antiga granxa monástica do Outeiro, hoxe restaurada como casa particular.
Subimos á estrada e camiñamos pola berma uns cen metros para logo baixar a carón dunha viña e retomar o camiño. Máis adiante descubrimos un edificio que chama a atenciòn situado por abaixo da vía do tren. Resulta ser unha pequena e discreta central hidroeléctrica.
Chegaremos de novo á estrada e atravesarémola para visitar a dispersa aldea do Prexigueiro e descubrir fontes, unha capela, un cruceiro, casas tradicionais de boa traza...
Baixamos e seguimos as indicacións do balneario. Non ten perda.
Para o retorno ao punto de partida, desviámonos a visitar unha interesante ponte sobre o Cerves, a Ponte do Prexigueiro, que está indicada na rúa de acceso á zona termal. En troques de retornar pola estrada por onde baixaramos, continuamos polo camiño da dereita ata a vía. Camiñamos uns metros pola beira desta e seguidamente xa se separa este antigo camiño real que viña da zona da Frieira cara Ribadavia e que servíu de vía de comunicación durante séculos.Tamén ao pasar o río do Outeiro facemos unha alternativa, seguindo a beira esquerda deste ata a embocadura no Miño, lugar onde está unha depuradora.
Os camiños están transitables aínda que algúns vese que foron desbrozados vai tempo e xa as mimosas están medrando de novo. Non lle viría mal unha pasada de desbrozadora.
Ruta moi interesante, non moi esixente e adecuada para días de mal tempo (salvando que nas partes de camiños antigos hai algo de vexetación). Recomendable.