Rauðakúla og Hreggnasi á Snæfellsnesi

Rauðakúla í Eyja- og Miklaholtshreppi er fjall sem blasir við manni þegar maður ekur þjóðveginn.
Þetta fallega rauða fjall er í góðum félagsskap Ljósufjalla sem eru hærri og þekktari en milli þeirra kúrir Hreggnasi (sjá fyrstu mynd).

Lagt er í hann af gamla þjóðveginum um Kerlingarskarð og fljótlega gengið upp úr gróðri inn í auðnina.

Þegar komið er upp fyrstu brekkurnar fer maður að sjá í kollinn á Rauðukúlu en Hreggnasi liggur í skjóli hennar og sést ekki.

Sem maður nálgast kúluna fara að koma í ljós fleiri fjöll í nágrenninu.

Norðan við Rauðukúlu er annað rautt fjall, töluvert lægra, sem heitir líka Rauðakúla og ég kýs að kalla Litlu-Rauðukúlu til aðgreiningar.

Annað fjall sem kallar á athygli og er enn norðar er Drápuhlíðarfjall, skjanna hvítt og fagurt.

Þegar komið er upp á Rauðukúlu opnast fyrir glæsilegt útsýni yfir Snæfellsnesið þar sem sést vel til Ljósufjalla og Snæfellsjökuls í góðu skyggni.
Þá kemur líka Hreggnasi í ljós í sínu fallega formi og litum.

Upp á Hreggnasa ákvað ég að fara hrygginn eins og sést á myndum og klöngrast þar aðeins í grjóti og klettum, smá brölt en ekkert sérlega hættulegt.
Útsýnið þegar komið er upp er síðan stór glæsilegt, litadýrðin í Ljósufjöllum og betri yfirsýn á Litlu-Rauðukúlu og Drápuhlíðarfjall.

Að horfa á Litlu-Rauðukúlu og Drápuhlíðarfjall ofan af Hreggnasa, annað fjallið svona fallega rautt og hitt skjanna hvítt fær mann til að ímynda sér að hér sé náttúran að efna til veislu og í veislunni sé boðið upp á bæði rautt og hvítt :)

Svona í lokin verð ég að minnast á eitt atriði varðandi Litlu-Rauðukúlu sem mér fannst stór merkilegt.
Þegar komið er langleiðina upp að Rauðukúlu og Litla-Rauðakúla er fyrir manni í há norður er eins og hún sé að fylgjast með manni því í miðri hlíð hennar er eins konar sveipur eða auga (sjá mynd).
Náttúran kemur manni endalaust á óvart :)

Eins og þessi texti ber með sér og lesanda er eflaust orðið ljóst fannst mér töluvert mikið til þessarar fjallgöngu koma og mæli hiklaust með henni við alla.