Pitões ás Gralheiras/Gralleiras

Moi boa ruta de monte. Feita seguindo este track: https://gl.wikiloc.com/rutas-sendeirismo/ruta-de-as-gralleiras-de-pitoes-16280025
Comeza na zona das cortes de Pitões das Junias, a onde se pode chegar por Requiás, no concello de Muiños. Sáese por unha pista que leva cara os prados, para seguir logo por un anaco de calzada e logo a valmonte. Todo o resto do percorrido vai por carreiros da facenda ou directamente polo monte pero ao tratarse de uzais de alta montaña é transitable. Unha ruta para amantes do monte, non para xente urbanita, dito con todo respecto.
Toda a andada é un goce para a vista, polas paisaxes impresionantes que se vai descubrindo. Nas partes máis altas asombran as xigantescas moles graníticas. A erosión e os fenómenos naturais teñen labrado formas suxestivas e colocado os penedos en posicións de equilibrio imposibles. A xinxa do pastel é a composición de penedas cabalgadas no Coto das Gralleiras, ou Gralheiras; un goce!
Seguindo pola liña imaxinaria da fronteira pasamos a carón do Coto de Fontefría. Quen non coñeza e teña aptitude para subir ao alto pode desfrutar dunhas magníficas vistas. A subida pode presentar dificultade para persoas non experimentadas ou con vertixe.
Nesta zona é doado observar cabras montesas, Neste caso, un bo rabaño delas e outro grupo menor. Non son mansas, precisamente, pero xa están algo afeitas á presencia humana, polo que parece. Tamén se poden ver cabalos soltos.
Por estas datas aínda a primavera non chegou a esta zona. Tan só algunhas florciñas se mostran nas zonas máis abrigadas.
Non é unha ruta marcada, como queda apuntado. Hai abondosos estantes ou mariolas en boa parte do percorrido para axudar a seguilo pero o GPS é (case) imprescindible. Por suposto, debe levarse calzado e roupa axeitados. Hai canos de auga no principio da ruta e ao longo dela varios regatos (en época de moita augada pode ser difícil atravesar algún). As condición meteorolóxicas poden ser un obstáculo nas zonas de montaña; cadaquén debe considerar as posibilidades.
Ruta moi recomendable pero para persoas con certa preparación e capacidade física.