Pel Peranchu y la canalización d'agua a Xixón a Peñamayor y Les Foces del Pendón

La Era (Piloñeta) - La H.uente (Piloñeta) - Molín de Pra - Camín del P.R.AS-198. "Ruta de la Ribera del ríu Peña" - Les Mesties - El Peranchu - Bobia - Senderu pela canalización de Los Arrudos - Xerrrrina Oroxu - Canalización de Los Arrudos - A l'altura Fayacava esvíu a manzorga pa subir a Peñamayor per cara oeste - Peñamayor - Les Antenes - Llames LLagar - Les Praeres - La Varallonga - Mayáu Pastor- Colláu La Canal - La Canal - Ponte Pendón - Les Meceures - Foces - Los Fornos- H.uensanta - La Ferrería - El Rebollar - La Retuerta (Piloñeta) - La Era (Piloñeta).

A mediaos de xunu y por fin un bon camín pel Peranchu y Bobia pa llegar a la xerrina Oroxu.
A lo último'l tardíu, pel iviernu o nel entamu la primavera siempre subiere bastante bien pel vieyu camín de Bobia y dempués monte a traviés hasta la guapa y vistosa xerrina Oroxu. N'otres époques del añu yá nun me resultaba tan fácil pol espoxigue la broza.
El percorríu d'esti track, que na so parte final sigue'l trazáu de la trayida d'agua de Los Arrudos pa Xixón, soluciona'l pequeñu problema que yera, hasta fai bien poco pa min, subir al Oroxu o a Peñamayor per esta guapa fastera del nuesu monte.
Tamién tenía gana, pasaren más de diez años dende la última vez, de subir a Peñamayor pel oeste; pela parte Fayacava.
Prestáronme abondo les dos coses. De xuru que nun tardaré en volver a facer el paséu introduciendo dalguna variante na segunda parte'l percorríu. Ye dicir dempués de Peñamayor.
Nesta ocasión baxé pel picu H.ueyu (Les Antenes) y dempués pela yá vieya sienda qu'usaron antaño pa subir el material pa les casetes y les antenes. Tamién tenía esti trayeutu daqué abandonáu.
P'acabar, una más que guapa mañana de monte, La Varallonga y Les Foces del Pendon. Sí, milenta veces patiao, pero que nunca cansa...
Ye perfeutamente posible entamar y acabar el paséu nel molín de Pra. Nesti casu dende la Ferrería podría siguise pe S L 8 "Senderu Local de Nava" o subir pela viesca'l Rebollal pa sin casi entrar en Piloñeta baxar los cuatrocientos metros qu'hai a Pra.

(Anque toes son de la ruta, munches de les semeyes nun se correspuenden colos llugares de los waypoints).

Esti track y les informaciones son consideraciones propies.
Debe tenese en cuenta que les siendes y caminos, col pasu del tiempo, cambien y xeneramente empeoren pol aumentu de broza y maleza. La perda y zarru de caminos ye dalgo que tolos qu’andamos pel monte conocemos bien.
Pensamos que la mejor manera de hacer una ruta que desconocemos ye estudiar varios track y elexir los más recientes. Si puede ser más de uno y que se asemeyen.
Les condiciones meteorolóxiques, la borrina por exemplu, siempre deben tenese en cuenta.
Tamién ye perimportante la preparación física y téunica de la xente que realice el percorríu.
La nuesa intención ye ayudar a facer una ruta que a nós mos prestó. Nun garantizamos que’l camín que suxerimos seya la meyor opción. Por todo ello nun mos facemos responsables de fechos que puedan ocasionar dalgún accidente o trestornu.