Ourense (perimetrado) Ruta á necrópole de S. Mamede (vilar de Astrés) por Cudeiro e Sartédigos

Camiñada apta para o confinamento municipal. Feita seguindo esta: https://gl.wikiloc.com/rutas-sendeirismo/ourense-comarca-de-ourense-ourense-necropolis-de-san-mamede-18993703 aínda que con modificacións.
Sáese do Barrio da Ponte polo Camiño Vello de Cudeiro que ven sendo Camiño de Santiago e, polo tanto, está sobradamente indicado (aínda que logo abandónase). Nesta parte temos progresivamente unhas vistas espléndidas do val do Miño e das terras que o arrodean ata a Serra de Queixa e outras zonas bastante lonxanas. Fantástico miradoiro é o curuto onde está a capela de San Marcos da Costa (por iso está ela aí).
Ata Sartédigos a camiñada descorre por estradas, rúas ou pistas de terra. A partir desta aldea iremos por medio dunha carballeira pero o camiño non está coidado polo que (especialmente logo de tanta choiva) está incómodo nalgún punto.
En Vilar tentei combinar con outra ruta para chegar ás tumbas pero foi un erro total. A mellor maneira de chegar parece que é a seguida finalmente: baixando dende Vilar por un sendeiro que sae a carón dunha fonte e lavadoiro. Non está coidado pero pásase sen dificultade. As tumbas están totalmente descoidadas o cal é un insulto (máis) á nosa historia e riqueza cultural... Porén, paga a pena a visita. Nesta páxina máis información: http://patrimoniogalego.net/index.php/57091/2014/03/necropole-de-san-mamede/
A baixada cara Ourense faise pola zona da aldea da Bouza. Aquí os camiño están en moito peor estado, tanto pola erosión da auga coma pola maleza que os afoga. Nesta altura, logo de tanto chover, corre a auga por moito treito o que sumado ao desnivel faino dificultoso e mesmo perigoso por esvarar.
Xa no fondo (Quintela) atravésase as vías e a estrada ata chegar ao paseo do Miño ("ruta do Colesterol") e retorno á cidade.
Como se desprende da descrición, a ruta non e agradable polo piso (alcatrán), a erosión e a broza que os pecha nalgúns treitos. Ten tamén un importante desnivel. Paga a pena, iso si, polas vistas, os elementos construídos e a necrópole.
Ruta non apta para persoas sen preparación nin forma física adecuada.