Erremendia-Menditxusia-Araxamendi-BORROKOXKO (1395m)-Erremendia`

Arratsalde pasako mendi ibilaldia Euskal Pirineoan.
3 ordu eta 45 min. iraupena.

Ibilaldaia Erremendiako saiakuntza baserrian abiatzen da, bertan autoa utzi eta Lojanzko iturria aldera joko dugu pista zabaletik. Iturria baino apur bat lehenago ezkerretara gorantz abiatzen den basako pista bat dago, horixe hartu eta jarraituko dugu pagadian barrena.

Menditxusiako lepora iristean ekialdera dagoen senda estu bat jarraitu beharko dugu azken zatia igotzeko, pagadian gora igotzen da eta senda ez da oso nabaria. Tontorra harkaiztegi malkartsu batean dago eta ez dago toki askorik bertan baina tako geodesikoa behitzat ikusi eta zapaldu ahalko dugu.

Ondoren lepora jeitsiko gara bide beretik eta eguneko bigarren tontorraren bila joango gara, Araxamendi (1338m). Lepoaren inguruan senda seinaleztatua dago, aldapa labur bat igoko dugu lehenik pagadian eta ondoren ekialderantz bizkar luzezka bat. Tontor hau zapaltzea ia ezinezkoa da, harkaitz orratzez osatua dago ingurua eta egiatan bitxia eta harrigarria ikusteko.

Jarraian Askazarrak aldera jeitsi beharko dudu eguneko hirugarren tontorra egiteko, jeitsiera hau pagadi zabalean barrena erraz egin daiteke norantza aurkitzen lagunduko gaituen gps gailu batekin. Askazarrak lepora iristen garenean Borrokoxko (1395m) alderako igoera abiatuko dugu, igoera hau pagadi soildu batean gora igo nuen nik, senda ez dago argi baina gorantz egin behar da etengabe malda gogor samarrean. Gainaldera heltzean mendebalderako norabidea hartuko dugu eta hesiaren ondotik jarraitu tontorreraino. Basotik irten garenetik zelaigune ederra izango dugu lagun.

Behin tontorra zapaldutakoan, mendebalderantz jarraituko dugu Borrokoxko gainaldeko gandor guztia osatuz. Tarte honetan ezpelaren arteko bidean ibiliko gara, erraz jarrai daiteke. Pista nagusiarekin topatzen garenean, hau hartu eta iparralderako norabidean jarraituko dugu bide guztian zehar abiapuntu izan dugun Lojanzko iturria aldera iritsi arte. Esan behar da tarteka pista utzi eta bere ondotik abereek eginak dituzten senda arrastoak jarrai daitezkeela, ibilaldia atseginagoa eginez, nik horrela egin nuen.


Track hau ez da GPS gailu batez grabatua izan, baizik eta maparen gainean marraztu da, hortaz bere zehaztasuna gutxi-gorabeherakoa da. Erabiltzea nahi duenak bere arrisku eta erantzukizunez egiten du.