Erlora goiko bidetik

Oraingo honetan, bide ezberdina proposatzen dizuegu Izarraitzera igotzeko.

Beti bezala, herriko plazan hasiko dugu ibilbidea, Santiyo kaletik parrokiara iritsi eta honen atzetik, hilerrira igoko gara. Hemengo bidegurutzean eskuinetara hartuko dugu, Abitain baserritik aldapan gorako bideari ekinez, Mentaberri baserrira iritsi arte. Honen parean, eskuinetara hartuko dugu.

Hemendik, metroren gutxiren buruan Soreasutik datorren bidearekin bat egingo dugu. Bide hau jarraituko dugu, ahalik eta bitan zatitzen den arte, eta puntu honetan ezkerreko bidetik egingo dugu gora. Minutu batzuren buruan, Izarraizko Birako bidearekin egingo dugu bat, eta ibilbide hau egingo dugu Haitzbakar oinera iritsi arte. Hemen bidea utzi, eta ezkerretarako bidea hartuko dugu, aldapan gora. Ate bat gainditu eta basoan sartu ostean, lehenengo bidegurutzean eskuinetarako bidetik joango gara, Haitzbakar gainera eramango gaituena.

Eguneko lehenengo "gailurra" egin ostean, aldapan behera segiko dugu, bidegurutze batera iritsi arte: hemen ezkerretara, eta aldapan gorako bideari ekingo diogu. Basotik barrena doa bide hau ia ibilbide guztian eta, nahiz eta markatuta ez egon, nahiko erraza egiten da jarraitzea. Aurrera egingo dugu, pixkanaka Izarraitz inguratuz eta, behin iparraldera pasata, Ondarbasotik igotzen den bidearekin egingo dugu bat.

Metro batzutan zehar jarraituko dugu ibilbide hau eta berriro ere ezkerretara egingo dugu, berriro ere markatu gabeko baino ondo zapaldutako bide baten barrena. Altuera irabazi eta basotik aterako gara, eta hurrengo bidegurutzean berriro ere gora egingo dugu. Zelaian eta harri artean, aldapa gogorrak gainditu eta laister izango dugu begi bistan Zestoako gurutzea. Hortik Erloko gailurrera, Erloko gurutzera eta azkenik Xoxoteko buzoira. Aterpetik pasa ostean, itzulera bide normaletik egingo dugu.