De Ribarteme a Casa da Auga (As Neves)

Este roteiro non sinalizado artéllase sobre a valgada do río Termes, xa preto da súa desembocadura no Miño e vainos dar coñecer senlleiros elementos do patrimonio do concello de As Neves.
Pódese comezar na igrexa de Santiago de Ribarteme (1669), que conta cun escudo nobiliario das Casas de Fontán e Barreiro e a seu carón está a Casa da Inquisición. Seguindo a verea do Vía Crucis acadamos o Calvario de As Penlas.
Baixamos cara a capela de O Cristo e un camiño entre piñeiros lévanos ata a ponte sobre o río Termes. En Chan de Vide tomamos uns folgos na súa área de lecer para deseguido enfilar para as beiras do río Miño. O carreiro métenos nunha sombriza fraga, con moitas sobreiras, e onde as raiolas do sol cústalle entrar.
Agora hai que subir ata a capela de Santa Lucía e a poucos metros temos a igrexa de orixe románica de Santa María de Vide e nun muro do atrio veremos un reloxo de sol do século XIII e que servía para indicar as horas de rega. O que era a antiga casa reitoral alberga hoxe en día o museo Casa da Auga. Vide conta cuns seis quilómetros de levadas para o regadío, pénsase que da época romana. A considerar tamén o peto e o calvario que hai na contorna.
Subimos pola lomba de Teceláns e camiñamos durante medio quilómetro paralelos a levada que vai ata A Canliña.
A seguinte etapa é a freguesía de San Cibrán e moi preto da súa igrexa parroquial érguese un artístico cruceiro con serpe enroscada no fuste. De aquí saímos de novo para as marxes do Termes e n´A Senra salvamos o río pola ponte de medio arco de orixe romana nun lugar de lendas e tamén de paso para A Franqueira da raíña Isabel de Portugal. Acompaña a fermosa ponte un policromado peto de ánimas do ano 1815.
Só resta acadar a igrexa de Santiago mergullados nun fondo e vizoso carreiro polas ourelas dun rego.