De Luso a Mata Nacional do Buçaco

Luso, freguesía do concello de Mealhada, é un centro de enorme importancia turística ao contar a vila cun centro termal de gran tradición e máis situarse aos pés dunha extensa e vizosa fraga como a Mata Nacional do Buçaco.
Arredor dos seus mananciais de augas para tratamentos renais e da pel levantouse no ano 1.838 a primeira casa de baños, converténdose Luso desde aquela nun centro termal e de descanso.
O bosque do Buçaco medrou en tamaño e variedade cando alí se asentou a Orde dos Carmelitas, no ano 1.628. Intramuros creceron árbores muitas delas hoxe seculares e con exemplares de texos, ginkos, piñeiros, araucarias, cedros, secuoias, cipreses, tuias xigantes, choupos, nogueiras, bidueiros, ameneiros, abeleiras, faias, castiñeiros, sobreiras, carballos, loureiros, buxos, acivros, rododendros, freixos...

O roteiro proposto comeza no centro de Luso e, logo de visitar a súa lagoa, subiremos para mergullarnos na Mata, pasando polas súas históricas portas da Serra, da Rainha, da Sulla e da Cruz Alta e preto de aquí imos ao miradoiro con vistas desde Coimbra ata Aveiro.
Baixamos pola Via Sacra con súa colección de Pasos relixiosos e chegamos ao abraiante Palacio Real do Buçaco, (1.888) construido en parte sobre o Convento de Santa Clara (1.628) e antiga residencia real.
Do Palacio, hoxe establecemento hosteleiro, seguimos descendendo pola sombriza e verde Mata para chegar de novo a Luso.
Un recuncho que deberiades ver tamén (non está no track do roteiro) e o Vale dos Fetos, formado por xigantescos fentos arbóreos provintes de Australia e Nova Zelandia.