Azkaine. Bizkarzun. Zuhalmendi. Azkaine.

Gaurko gure asmoa zen Azkainetik hasita eta Bizkarzun, Zuhalmendi, eta Esnauretik pasa ondoren Azkainera itzultzea ibilbide zirkularra burutuz. BAINA gau osoan euria barra-barra egin du eta erreka oso hazita dator eta ez dugu pasatzerik izan. (05 bidegunea). Horregatik atzera egin eta Bizkarzun mendiaren magalean zeharka joanez bordaraino iritsi gara (08 bidegunea). Bertan egin dugu hamaiketako laburra, izan ere eguraldia nahiko euritsu dago eta ez gara sobera luzatu. Bertan garela 4x4 auto batean bordako jabea agertu da. Harekin solasean hasi gara, euskaraz noski, eta amorrua sentitu dut ezin diodalako behar bezala ulertu. Zernahi gisaz, kontu batzuk esan diogu elkarri. Adibidez, udan, gure harridurarako, Donostiko koro eta orkestra batek emanaldi bat eskaini zuela han bertan esplikatu digu. Ez dakigu Es Incarnatusekoak edo Donostiko orfeoikoak izango ote ziren. Jakiteko gogoz gelditu gara. Gero pista eroso batean, Larun mendia lagun dugula, zerriak hazteko erabiltzen den lur-sail baten aldamenetik pasatu gara (11 bidegunea).
Zuhalmendirako igoera, horrenbestez, oso erosoa da. Erreka pasatu nahian denbora dexente galdu dugunez nahiko juxtu gabiltza bazkaltzera garaiz ailegatzeko eta, horrela, zuzen jaitsi gara, igoerako bide beretik.
Burutu dugun ibilbidea ez da guk hasieran pentsatua genuena baina hala ere interesgarria iruditzen zait hainbat arrazoiengatik. Donostitik gertu dago eta ibilbide erraza, atsegina eta erosoa da. Ikusten da euskara eta euskal kultura oso presente egon dela inguru hauetan.
02.argazkian Michel Chourio euskal idazlearen oroimen-xafla bat dago.

https://aunamendi.eusko-ikaskuntza.eus/eu/xurio-mixel/ar-36247/

Hegoaldeko mendizaleak, eta ez-mendizaleak ere, oso gutxi etortzen gara Iparaldera. Muga psikologikoa eragin handia du gugan eta maizago etorri beharko ginateke paraje hauetara.
Esan bezala ibilbide erraza, atsegina, erosoa eta Donostitik gertu dagoena. Ni neu Xoko Ona tabernan bazkaltzeko gogoz gelditu naiz. Luze gabe itzuliko naiz.