Aia Pagoeta

2024-03-21

Aiatik Pagoeta ingurura egindako ibilbidea. Auspoa berotzeko politta izan arren, ikusmira bikaineko ibilbidea da hau, Ernio zein kosta aldera.

Aiako eskola ondoko aparkalekuan utzi dut kotxea. Aiako kaleak igaro eta Pagoetara daramagun bidea jarraitu dut. Gas depositu eta ur-deposituaren ondotik pasa eta 100- 150 metro inguru aurrerago, pista utzi eta eskubitara eginda, Pagoetako parke naturalera sartzen gaituen gurdi bidea hartu dut. Arreta izeneko tumulu pareraino jarraitu dut eta pixka bat aurrerago ezkerretara bidea utzi eta Arreta izeneko mendi tontorra igo dut.
Begiratoki bikaina.

Hemendik Olartetako trikuharriraino belazean zuzen igota iritsi naiz. Aldapa politta, bai halajaina. Olarteta tontorra bere poste geodesikoarekin oso eskuera geratzen da eta erraz iristen da. Hor dagoeneko pagoetako mendi-multzoaren goiko aldean gaudela esan dezakegu.

Olartetatik Murugilera bidea ikusiaz erraz iristen da. Murugil tontor ondoan dago Murugil trikuharria eta pittin bat aruntzago Pagoeta tontorra, bere buzoi eta guzti.

Pagoeta tontorrean nengoela mapan ikusi nuen Amabirjin iturria bazela, baina inguruan bueltaka jardun arren, ez nuen aurkittu. Inguru horretatik belazea zeharkatuz Urruztume tontorerra iritsi naiz. Hemen ere poste geodesikoa dago.

Zulora pixka bat jetxita borda aldamenetik pasa eta oso azkar Pagoetako gurutzera iristen da. Handikan basora “kalbarioaren gurutzeak” jarraituz Aia alderako bidea erraz jarraitu dut, Bidean mapak ere beste iturri bat ere markatzen zidan baina han erreak bidea besterik ez dut aurkittu.

Arretako tumulura iritsitakoan gorantzako bidearekin bat egin det. Bidea jarraituz, erraz, berriro Aiara iritsi naiz.

Ikaragarri gustatu zait egindako buelta hau.