20191031 Aizarnazabal-Iraeta-Zestoa-Akua-Aizarna-Altzolarats-Aizarnazabal

Aizarnazabalen hasi eta bukatzen den txangoa, zailtasunik gabekoa eta erraz egiten dena. Aizarnazabalen hilerriko bidea hartuko dugu eta hau pasatu ondoren Amilibia baserriraino asfaltozko bidetik joango gara. Hemen eskubitara hartu eta Iraetara garamatzan zapaldutako lurrezko pista hartuko dugu. Laister urola ibaia pasako dugu Aizarnazabal eta Zestoa banatzen dituen zubitik eta bidea jarraituz 10 bat minutuan Iraeta auzoan egongo gara.
Hemen bigarren aldiz gurutzatuko dugu ibaia eta berehala ezkerrera joko dugu, Zestoaraino eramango gaituen bidegorria hartuz (laister trenbide zaharra hartuko dugu). Bertatik jarraituko dugu Zestoako lauiturraino eta hemen berriz ere Urola gurutzatuko dugu, herrian sartuz.
Dagoeneko itxita (eta utzita) dagoen Arocena Hotelaren parean errepidea pasatuko dugu horretarako dagoen lurrazpiko pasabidea erabiliz eta jarraian aldapan gora hartuko dugu, Akua auzorako bidea.
Akuara heltzean (baseliza txiki bat), ezkerrera hartuko dugu eta ehun bat metro ondoren harrizko galtzada hartuko dugu (kartela -> Aizarna).
Aldapa lasaia baina luzetxoa igo ondoren, Aizarnara helduko gara eta auzo honetako plazan San Pelaio bidea hartuko dugu ezkerrera. Hasieran apur bat behera eta jarraian gora eginaz, kilometro baten ondoren San Pelaio baselizara helduko gara. Hemen ezkerrera hartuko dugu porlanezko pista eta berehala eskubira bidezidorra, segidan ezkerrera beheraka eginaz.
Aldapan behera eginaz, Altzolarats-eko palazio zaharra dagoen tokira helduko gara (dagoeneko hondatuta). Hemendik inolako aldaparik gabe Txiriboga auzora helduko gara eta zubia pasatuz, Aizarnazabalera doan aldapatxoa igoko dugu.
Lasai hartuz 3 ordu eta erdi - 4 ordutan egiten den txango polita.