Tournaboup - Lacs de La Lahude - Pic de Barbe

Joan-etorriko ibilbidea. Zailtasun berezirik ez dauka, baina aitortu behar da Pic de Barbera igotzeko azken maldak nahiko pikoak direla. Elur aldetik, zonalde ona dela esan daiteke. Elurrak nahiko denbora irauten du, eta hego orientazioa izanik, elur gogorra eta izotza sahiesteko aukera gehiago izango ditugu.

Ibilbidea Tournaboup aparkalekua baino gorago hasten da (Bareges), 1550m altueran. Normalean puntu honetatik aurrera errepidea itxita aurkituko duzue. Hasiera batean Tourmaletera doan bidearen gainetik igoera leuna egingo dugu.

Errepideak herradurazko kurba egiten duen puntuan Aoube bailaran sartuko gara. Hasierako zatia ezerosoa izan daiteke, erreka gurutzatu eta ibarraren ezker aldetik Aoube-ko etxolara iritsi arte.

Puntu honetan mendebalderako norantza hartuko dugu, hainbat ibartxo gurutzatuz, tartean Mousquere izenekoa, ondoko bailarara sartu arte. Behin gurtzatuta, igoera erosoagoa izango da Lahudeko laku multzoraino (ez dira ikusten errazak elurrez estaliak daudenean).

Puntu honetan igoeraren zati pikoena hasten da. Gure kasuan, lehen zatia kutxillak erabiliz egin genuen, azkenengo zatia aldiz, kranpoiekin. Pic de barbe azpian dagoen lepoi txikira iritsi aurretik aurkituko duzue malda zailena, elurraren egoeraren arabera tentuz egin beharrekoa (30º-35º inguru).

Tontorrean ikuspegia ederra da, bereziki Neouvielle-ko mendi multzora begira. Jeisteko, mendiaren hego ekialdeko Couloirra hartu genuen. Estuagoa izanagatik, igoerako bidea baino malda konstanteagoa eskaintzen du, eta gure ustean, arrisku txikiagoa. Eskiatzaile trebeek arazo gabe jeitsiko dute, besteok zerbait gehiago sufrituko dugu. Betiere, elurraren egoerak eragin handia izango du jeitsiera honen zailtasunean (kontuz elur gogorra eta izotzarekin puntu honetan).

Gainontzeko jeitsiera igoerako bidetik egin.